SN (VOM)
အသက် ၇၈ နှစ်အရွယ် ဒေါ်မြင့်ရီ တယောက် ဒီကနေ့မှာတော့ လဝကရုံး (လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာန) ကို သွားဖို့ ပြင်ဆင်နေပါတယ်။ သူမရဲ့ သမီးဖြစ်သူကတော့ လိုအပ်တဲ့ စာရွက်စာတမ်းတွေကို အိတ်တလုံးထဲကို ထည့်ပေးနေတာပါ။
“မှတ်ပုံတင် အရေးကြီးတယ်နော်။ မေ့နေဦးမယ်။ စမတ်ကတ်လုပ်ရင် မှတ်ပုံတင် မပါလို့မရဘူး” လို့ ဒေါ်မြင့်ရီရဲ့ သားဖြစ်သူက အနားကနေ သတိပေးနေပါတယ်။
ကျောက်ကပ်နဲ့ ဆီးချိုဝေဒနာသည် တယောက်ဖြစ်တဲ့ ဒေါ်မြင့်ရီအတွက် ကျန်းမာရေး ခဏတာ အပေါင်းလက္ခဏာ ပြလာတဲ့အချိန်မှာ လဝကရုံးကိုသွားဖို့ အကြောင်းဖန်လာတာ ဖြစ်ပါတယ်။ အိမ်အပြင်မှာတော့ မိုးက တိတ်လိုက်၊ ရွာလိုက်နဲ့ ဖြစ်နေပါတယ်။
“မိုးအခြေအနေကလည်း ဘယ်လိုမှန်းမသိဘူး။ မိုးထဲရေထဲ အမေ့ကို မသွားစေချင်ပေမယ့် အမေ့ကျန်းမာရေးကလည်း တနေ့ ရွှေ၊ တနေ့ ငွေ ဆိုတော့ ကျန်းမာရေး ကောင်းတဲ့အချိန်လေး သွားနိုင်တုန်းလေးမို့သာ သွားရမှာ။ မဖြစ်မနေမို့သာ။ ဒီအချိန် ကျန်းမာရေးလေး နည်းနည်းကောင်းလာတာကိုပဲ ကျေးဇူးတင်ရမလို။ အရင်ရက်တွေကတော့ ခြေထောက်တွေ ယောင်နေတာ လမ်းတောင် မလျှောက်နိုင်ဘူး။ ကျန်းမာရေး မကောင်းတဲ့သူတဲ့ သက်ကြီးရွယ်အိုတွေကို တမင်သက်သက် ဒုက္ခပေးနေသလိုပဲ” လို့ ဒေါ်မြင့်ရီရဲ့ သမီးဖြစ်သူက ပြောပါတယ်။
လဝကရုံးရှေ့ကို ဒေါ်မြင့်ရီတို့ငှားလာတဲ့ တက္ကစီကားလေး ရောက်လာတဲ့အခါမှာတော့ မိုးက ပိုလို့တောင် သည်းလာပါတယ်။ သားနဲ့ သမီးရဲ့ အကူအညီနဲ့ ကားပေါ်ကနေ ဒေါ်မြင့်ရီတယောက် ဖြည်းဖြည်းချင်း ဆင်းလာပါတယ်။
ရုံးထဲ ဆိုင်ကယ်၊ ကား ဝင်ခွင့်မရှိတဲ့အတွက် သက်ကြီးရွယ်အိုတွေဟာ ဂိတ်ပေါက်ဝနေ ရုံးထဲအထိ လမ်းလျှောက်သွားကြရပါတယ်။ ကျန်းမာရေး မကောင်းသူတွေအတွက်ကတော့ အလွန်ကို ဒုက္ခများလှတဲ့ အခြေအနေပါ။ လုံးဝ လမ်းမလျှောက်နိုင်တဲ့သူ၊ လေဖြတ်ထားသူတွေကတော့ ဘီးတပ် ကုလားထိုင်လေးတွေနဲ့ပေါ့။တချို့ သက်ကြီးရွယ်အိုတွေကတော့ သူတို့အိမ်သားတွေ ချီမပြီး လာကြရတာကို တွေ့ရပါတယ်။
“ကျန်းမာရေး မကောင်းတဲ့သူတွေကို ဒီလိုကြီး မြင်ရတာ တော်တော်ကို စိတ်မကောင်းဖြစ်ရတယ်။ အိပ်ရာထဲလဲနေတဲ့ ပင်စင်စားတွေကို တမင်ခေါ်ပြီး နှိပ်စက်နေသလိုပဲ။ တချို့ အဘိုး၊ အဘွားတွေဆို တုန်တုန်ချည့်ချည့်နဲ့ မတ်တတ်ရပ် တန်းစီနေရတယ်” လို့ မျက်မြင် တွေ့ရှိသူ တယောက်က ပြောပါတယ်။
လဝကရုံးထဲမှာ ဒေါ်မြင့်ရီလိုပဲ စမတ်ကတ်လုပ်ဖို့ စောင့်ဆိုင်းနေကြတဲ့ သက်ကြီးရွယ်အိုတွေ အများကြီးပါ။ အဘိုး၊ အဘွား အများစုရဲ့ မျက်နှာတွေကတော့ ပင်ပန်းနွမ်းနယ်နေကြတဲ့ ပုံပါပဲ။ လူအများကြီး ကြားထဲ ရောက်နေရတဲ့အတွက် ပိုပြီး စိတ်မသက်မသာ ဖြစ်နေကြပုံရပါတယ်။
နာရီပေါင်းများစွာ စောင့်ဆိုင်းပြီးတဲ့ အခါမှာတော့ ဒေါ်မြင့်ရီတယောက် စမတ်ကတ်လုပ်ဖို့ အလှည့်ကျလာပါတယ်။ စားပွဲတလုံးမှာ ထိုင်နေတဲ့ ဝန်ထမ်းတယောက်ကို မှတ်ပုံတင်ပေးရင်း စမတ်ကတ်နဲ့ ပတ်သက်လို့ လိုအပ်တာတွေမေးလိုက်ပါတယ်။ ဒီအချိန် ဘေးနားက စားပွဲက သက်ကြီး အဘွားတယောက်ကို သူမရဲ့ မြေးအရွယ် ဝန်ထမ်းမလေးက စိတ်မရှည်တဲ့ လေသံနဲ့ ငေါက်ငမ်းနေသံကို ကြားလိုက်ရတာကြောင့် ဒေါ်မြင့်ရီတယောက် မျက်နှာပျက်ရပြန်ပါတယ်။
ဒေါ်မြင့်ရီရဲ့ ဒေတာကို ကျွန်ပြူတာနဲ့ စစ်လိုက်တဲ့အခါ တချို့အချက်အလက်တွေ လွဲနေတယ်လို့ သိရပါတယ်။ ဒါကြောင့် အရင် မှတ်ပုံတင်လုပ်ခဲ့တဲ့ မြို့နယ်ရုံးကို ပြန်သွားခိုင်းပါတယ်။ ဒေါ်မြင့်ရီက လွန်ခဲ့တဲ့ ၁၉၈၉ ခုနှစ်လောက်က မရမ်းကုန်းမြို့နယ်မှာ မှတ်ပုံတင် ပြုလုပ်ခဲ့တာပါ။ ဒါကြောင့် မရမ်းကုန်းမြို့နယ်ကို ပြန်သွားရမှာ ဖြစ်ပါတယ်။
ဒီနေရာမှာ ဒေါ်မြင့်ရီအတွက် တခု ကံကောင်းတာက ရန်ကုန်မြို့ထဲမှာပဲ မှတ်ပုံတင် ပြုလုပ်ထားတာဖြစ်လို့ပါ။ နယ်မှတ်ပုံတင် ဆိုရင်တော့ သူမရဲ့ ရောဂါအခြေအနေ၊ လတ်တလော နယ်မြေ မအေးချမ်းတဲ့ အခြေအနေတွေကြောင့် ခရီးဝေးသွားဖို့ ဘယ်လိုမှ ဖြစ်နိုင်မှာ မဟုတ်ပါဘူး။
နစက က အငြိမ်းစား ပင်စင်စားတွေကို UID ကတ် QR မပြရင် ပင်စင်ထုတ်မပေးရ ဆိုတဲ့ အမိန့်ကို ပြီးခဲ့တဲ့ ဇွန်လ ၂၃ ရက်နေ့က ထုတ်ပြန်ထားတာပါ။ အခု ဇူလိုင်လကုန်တဲ့အခါ စမတ်ကတ်မရှိတဲ့ ပင်စင်စားတွေကို ငွေမထုတ်ပေးတော့ဘူးလို့လည်း အဲဒီ ထုတ်ပြန်ချက်မှာ ထည့်သွင်း ပြောဆိုထားတာပါ။
ဒါကြောင့် တလ ကျပ် တသိန်းကျော်၊ နှစ်သိန်းဝန်းကျင် ပင်စင်လစာကို အားကိုးနေရတဲ့ ဒေါ်မြင့်ရီတို့လို သက်ကြီး ပင်စင်စားတွေဟာ စမတ်ကတ် ရရှိနိုင်ဖို့အရေး တကူးတက အပင်ပန်းခံနေကြရတာ ဖြစ်ပါတယ်။ ပင်စင်လစာနဲ့ ရပ်တည်နေရသူတွေ၊ ဆေးကုနေရတဲ့သူတွေကတော့ ပင်စင်လစာ မထုတ်ပေးတော့မှာကို အလွန်အမင်း စိုးရိမ်နေကြပါတယ်။ တချို့ ပင်စင်စားတွေဟာ ခန္ဓာဝေဒနာအရ ကိုယ်ကို မတ်မတ် မရပ်နိုင်ကြတော့ပေမယ့် သတ်မှတ်ထားတဲ့ ဥပဒေအတိုင်း မဖြေမနေ လိုက်နာနေကြရပါတယ်။
“သက်ကြီးပင်စင်စား အတော်များများက လေဖြတ်၊ အိပ်ယာထဲလဲ နေကြသူတွေ များပါတယ်။ တချို့ မျက်စိတွေ ခွဲထားလို့ မျက်လုံး scan ဖတ်မရပါဘူး။ တချို့ လက်ဗွေ မအောင်ကြပါဘူး။ ဒီကြားထဲ အမည် စာလုံးပေါင်း အလွဲ၊ အမှားတွေကြောင့်လည်း ပြင်ရခက် ဖြစ်ကြရသေးတယ်။ တချို့ သက်ကြီးတွေဆို ထမရ၊ ထိုင်မရနဲ့ ပက်လက်နေနေရသူလည်း ရှိသေးတယ်။ ပက်လက်အနေအထားနဲ့ ဓာတ်ပုံလည်း ရိုက်ခွင့်မရလို့ ပြန်သွားကြရတာတွေ လည်း မြင်ရတွေ့ရတာ စိတ်မကောင်းစရာပါ” လို့ ကိုယ်တွေ့ကြုံခဲ့ရသူ တယောက်က ပြောပါတယ်။
စမတ်ကတ်လုပ်ဖို့အတွက် လဝကရုံးက ကွန်ပျူတာထဲမှာ ထည့်သွင်းထားတဲ့ စာရင်းတွေ ဆိုတာကလည်း လူ ၁၀ ယောက်မှာ ကိုးယောက်က မမှန်ကန်တာမျိုး ဖြစ်နေတယ်လို့ ဆိုပါတယ်။ ဒါကြောင့် ရက်ထပ်ရွှေ့ စောင့်ဆိုင်းရတာတွေလည်း ရှိနေတာပါ။ ဒီကြားထဲ နားမကောင်း၊ မျက်စိမကောင်းတဲ့ အဘိုး၊ အဘွားတွေ၊ အသက်ကြီးလာလို့ မှတ်ဉာဏ်စွမ်းအား နည်းလာတဲ့ အဘိုး၊ အဘွားတွေဟာလည်း စမတ်ကတ် ပြုလုပ်ပေးတဲ့ ဝန်ထမ်းတွေအတွက် စိတ်မရှည်စရာ၊ ဒေါသထွက်စရာတွေ ဖြစ်နေပါတယ်။
“နိုင်ငံတော်ရဲ့ လဝက က ကွန်ပျူတာ တာဝန်ယူသူတွေက ဘာဖြစ်နေလဲတော့ မသိ။ လူ ၁၀၀ မှာ ၇၀ လောက်က အမှားတွေအမျိုးမျိုးပဲ။ တာဝန်ကို မလေးစား၊ အလေးမမူကြပါဘူး။ ပြည်သူ့ဝန်ထမ်း ဆိုပေမယ့် ပြည်သူကို ဒုက္ခပေးနေသူတွေလို့ပဲ မြင်မိတယ်။ အထက်လူကြီးတွေကလည်း ကိုယ့်ဝန်ထမ်းတွေကို လျစ်လျူရှုမထားကြပါနဲ့လို့ ပြောချင်တယ်။ တာဝန်ကို ပေါ့ပေါ့ဆဆ မလုပ်ကြဖို့ ထိရောက်တဲ့ အသိပညာပေးမှုမျိုး ရှိစေချင်တယ်။ နောက်တခုက ဝန်ထမ်းအများစုက သူတို့ အဘိုးအရွယ်၊ အဘွားအရွယ် ပင်စင်စားတွေကို လုံးဝ ရိုသေလေးစားမှု မရှိတာ တွေ့နေရတယ်။ သူတို့လည်း အစိုးရဝန်ထမ်း ဖြစ်တဲ့အတွက် တနေ့ ပင်စင်စားဘဝကို ရောက်ကြရဦးမှာပါ။ အဲဒီတော့ ကိုယ်ချင်းစာစိတ်လေးတော့ အနည်းအကျဉ်း ရှိစေချင်မိတယ်” လို့ ပင်စင်စား မိသားစုဝင်တယောက်က ပြောပါတယ်။
ပင်စင်စား သက်ကြီးရွယ်အိုတွေဟာ ကိုယ့်ပင်စင်လစာလေးကိုတောင် မြန်မာ့စီးပွားရေးဘဏ်မှာ ကျားကုတ်ကျားခဲ သွားထုတ်နေကြရတာပါ။ တချို့ဆို ကျန်းမာရေးအရ ဘဏ်ကိုတောင် မသွားနိုင်တော့တဲ့အတွက် ကိုယ်စားလှယ်နဲ့ လွှတ်နေရတာပါ။ ဒါကြောင့် အခုလို အခြေအနေဟာ သူတို့အတွက် မနိုင်ဝန်ထမ်းနေရတဲ့ အနေအထားမျိုး ဖြစ်နေတယ်လို့ ပင်စင်စားတွေက ပြောပါတယ်။
“စမတ်ကတ်လုပ်ဖို့၊ ဝန်ထမ်းနဲ့ တခါ မျက်နှာချင်းဆိုင်ရဖို့အရေး အချိန် စုစုပေါင်း ၃ နာရီလောက်ကြာအောင် စောင့်ရသေးတယ်။ စောင့်လို့ ကိုယ့်အလှည့်လည်း ကျရော မှတ်ပုံတင်က အချက်အလက်နဲ့ ကွန်ပျူတာက အချက်အလက် လွဲနေတယ်ဆိုပြီး ပြန်လွှတ်၊ အဆင့်ဆင့် ပြင်ခိုင်းရော။ ကွန်ပျူတာထဲ သွင်းတဲ့ အချက်အလက်ကို စာရင်းထည့်တဲ့ဝန်ထမ်းက လွဲတာ။ ဒါကို ဒီပင်စင်စားကြီးတွေက တာဝန်ယူဖြေရှင်းရတယ်။ တသက်လုံး အခုလို သေခါနီးအထိ သုံးလာတဲ့ မှတ်ပုံတင်ထဲက အချက်အလက်ကို လုံးဝ လက်မခံကြဘူး။ စစ်ဆေးမယ်ဆိုပြီး ပြန်လွှတ်နေကြတယ်။ ပြီးတော့ သူတို့ကလည်း မှားသေး၊ မှတ်တမ်းကြည့်ဖို့ဆိုပြီး ငွေကလည်း နှစ်သောင်းလောက် တောင်းသေးတာ” လို့ ပင်စင်စား တယောက်က ပြောပါတယ်။
လဝကရုံးက ကွန်ပျူတာထဲမှာရှိတဲ့ အချက်အလက်တွေဟာ နာမည်မှား၊ စာလုံးပေါင်းမှား၊ မွေးသက္ကရာဇ်မှား၊ မိဘနှစ်ပါး နာမည် မှား၊ နေရပ်လိပ်စာ မှား အစရှိတဲ့ အမှားပေါင်း များစွာနဲ့ တခုမဟုတ် တခု မှားနေတတ်တယ်လို့ ဆိုပါတယ်။ အဲဒီလို အချက်အလက် အမှားတွေနဲ့ ကြုံတွေ့နေရတဲ့ ပင်စင်စားတွေက ၈၀ ရာခိုင်နှုန်းလောက် ရှိနေတယ်လို့ သူက ပြောပါတယ်။ အဲဒီလို ကွန်ပျူတာ အချက်အလက် မှားနေတာနဲ့ ပင်စင်စားတွေကို ကိုယ်မှတ်ပုံတင်လုပ်ခဲ့တဲ့ မြို့နယ်ရုံးကို ပြန်ဆက်သွယ်ပြီး ပြင်ခိုင်းတာတွေ လဝကရုံးက ပြုလုပ်ခိုင်းနေတာပါ။
ပဋိပက္ခဖြစ်ရာ နယ်မြို့တွေမှာ မှတ်ပုံတင် ပြုလုပ်လာတဲ့သူတွေ အတွက်ကတော့ ဒါဟာ ကြီးမားတဲ့ အခက်အခဲတခု ဖြစ်ပါတယ်။ အဲဒီအခါ စမတ်ကတ်က ချက်ချင်းမရတော့ဘဲ ရက်ပေါင်းများစွာ စောင့်ဆိုင်းရလေ့ရှိတယ်လို့ စမတ်ကတ် ပြုလုပ်နေသူတွေက ပြောပါတယ်။
“တချို့ကျတော့ လူက သက်ရှိထင်ရှား ရှိနေပေမယ့် သေဆုံးစာရင်းထဲ ရောက်နေတာတွေ ရှိတယ်။ ကျွန်တော့်မိတ်ဆွေ တယောက်ဆို စမတ်ကတ်သွားလုပ်တာ သေဆုံးစာရင်းထဲ ပါနေလို့ မော်လမြိုင်ကို သွားပြင်ပါဆိုပြီး ရန်ကုန်ကနေ မော်လမြိုင်ကို လွှတ်တယ်။ မော်လမြိုင်ရောက်တော့ တခါ အဲဒီက လဝကရုံးက ဆရာတွေက ရန်ကုန်မှာ လုပ်ရတာ ပိုလွယ်တယ်ဆိုပြီး ရန်ကုန် ပြန်လွှတ်တယ်” လို့ ပြည်သူတယောက်က ပြောပါတယ်။
အခုလို စမတ်ကတ်ပြုလုပ်ရာမှာ ဖြစ်ပေါ်နေတဲ့ ပြဿနာတွေကို ဖြေရှင်းနိုင်ဖို့ လဝက က စမတ်ကတ် မရှိသေးတဲ့ ပင်စင်စားတွေအတွက် မြန်မာ့စီးပွားရေးဘဏ်တွေမှာ ကွင်းဆင်း ဆောင်ရွက်ပေးမယ်လို့ ကြေညာလိုက်ပြန်ပါတယ်။ ဇူလိုင် ၂၃ ရက်နေ့ကစပြီး ပင်စင်လစာ ထုတ်ပေးတဲ့ ကာလအတွင်း မြန်မာ့စီးပွားရေး ဘဏ်တွေမှာ လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာန၊ မြို့နယ်ဦးစီးမှူးရုံးမှ ဝန်ထမ်းတွေက ကွင်းဆင်းပြီး နေ့ချင်းပြီး စမတ်ကတ် ပြုလုပ်ပေးသွားမှာ ဖြစ်တယ်လို့ ဆိုပါတယ်။
ဒါနဲ့ပတ်သက်လို့ ပင်စင်စား မိသားစုဝင်တယောက်က “ဒါကလည်း သွားနိုင်လာနိုင်တဲ့ သူတွေအတွက်ပဲ အဆင်ပြေတာပါ။ လေဖြတ်နေတဲ့သူတွေ၊ လမ်းမလျှောက်နိုင်တဲ့ သူတွေအတွက်က ဘယ်လိုမှ အဆင်မပြေနိုင်ဘူး။ အိမ်ကအဘိုးဆို အိပ်ယာနဲ့ကျောနဲ့ အမြဲတမ်းကပ်နေရတာ။ အသက်က ၉၀ ကျော်နေပြီ။ လုံးဝ မထနိုင်တော့ဘူး။ ဒီလို လူကြီးတွေအတွက် အိမ်တိုင်ရာရောက် လာပြီး စမတ်ကတ် လုပ်ပေးစေချင်တယ်” လို့ ပြောပါတယ်။
ဌာနဆိုင်ရာဘက်ကတော့ စမတ်ကတ် မပြုလုပ်ရသေးတဲ့ ပင်စင်စားတွေအနေနဲ့ အရင်အတိုင်း ပင်စင်ထုတ်ယူနိုင်တယ်လို့ အသိပေးထားတာပါ။ သို့သော်ငြားလည်း မဖြစ်မနေ စမတ်ကတ် ပြုလုပ်ရမယ် ဆိုတဲ့ သတ်မှတ်ချက်ကြောင့် အိပ်ယာထဲက မထနိုင်တဲ့ သက်ကြီး ပင်စင်စားတွေအတွက် ထည့်တွက် စဉ်းစားပေးသင့်တယ်လို့ သူက ပြောပါတယ်။
စမတ်ကတ် ပြုလုပ်တဲ့အခါ မျက်နှာအသွင်အပြင်၊ လက်ဗွေရာ၊ မျက်စိသူငယ်အိမ်တို့ကို မှတ်တမ်းတင်တာအပြင် အမည်၊ နေရပ်လိပ်စာ၊ ဖုန်းနံပါတ်၊ သွေးအုပ်စု၊ အီးမေးလ် အစရှိတဲ့ အချက်အလက် အပြည့်အစုံကိုလည်း ပေးရတယ်လို့ သိရပါတယ်။ ဒါပေမယ့် မျက်စိခွဲထားတဲ့ သူတွေအတွက်ကတော့ Scan ဖတ်လို့ အဆင်မပြေတာတွေ ရှိနေသလို တချို့ သက်ကြီးရွယ်အိုတွေ အနေနဲ့ လက်ဗွေ မပေါ်တော့တာတွေလည်း ရှိနေတယ်လို့ သိရပါတယ်။
“မှတ်ပုံတင်ထဲက အချက်အလက်နဲ့ သူတို့ ကွန်ပျူတာထဲမှာ ရှိတဲ့အချက်အလက် အကုန် ကိုက်ညီမှုရှိရင်တော့ နာရီဝက်တောင် မကြာဘူး။ အဆင်ပြေတယ်။ ဒါပေမယ့် အချက် တချက်လောက် လွဲလိုက်ပြီ ဆိုရင်တော့ အလုပ်ရှုပ်ပေရော့ပဲ။ တချို့တွေဆို စာလုံးပေါင်း မှား၊ သတ်ပုံမှားနေလို့ ပြန်ပြင်ရတာတွေ ရှိတယ်။ ဝန်ထမ်းကလည်း ဂရုတစိုက် စစ်၊ စမတ်ကတ် သွားလုပ်တဲ့သူ ကိုယ်တိုင်ကလည်း သေချာ အပြန်ပြန်အလှန်လှန် လိုက်ကြည့်၊ စစ်ပေးနိုင်မှ တန်ကာကျမယ်။ ဒါပေမယ့် ဒါကလည်း နားမကောင်း၊ မျက်စိမှုန်နေတဲ့ လူကြီးတွေအတွက်တော့ အဆင်ပြေနိုင်ဖို့ မလွယ်ဘူး” လို့ ပင်စင်စားတယောက်က ပြောပါတယ်။
နစကအနေနဲ့ အခုလို ပင်စင်စားတွေကို စမတ်ကတ် ပြုလုပ်ခိုင်းတာဟာ ပင်စင်လစာတွေကို လိမ်လည် ထုတ်ယူတာမျိုး မဖြစ်စေဖို့ ရည်ရွယ်တာ ဖြစ်တယ်လို့ အသိပေးထားပါတယ်။ ဒါကြောင့် လူပုဂ္ဂိုလ် မှန်ကန်မှု ရှိ၊ မရှိ စိစစ်နိုင်ဖို့ သက်ဆိုင်ရာ လဝကရုံးတွေကို သွားရောက်ပြီး စမတ်ကတ် ပြုလုပ်ကြဖို့ ကြေညာထားပါတယ်။ စမတ်ကတ် ရရှိလာခဲ့ရင်လည်း ပင်စင်ထုတ်တဲ့အခါ မိတ္တူ ယူဆောင်လာရမှာ ဖြစ်တယ်လို့ အသိပေးထားပါတယ်။
မြန်မာနိုင်ငံမှာ ပင်စင်စား လူဦးရေ တသန်းနီးပါး ရှိတယ်လို့ သိရပါတယ်။ အဲဒီ တသန်းနီးပါးထဲက ၇၀ ရာခိုင်နှုန်းဝန်းကျင်ဟာ လက်ရှိမှာ စမတ်ကတ်က ပေးတဲ့ဒုက္ခကို ခံစားနေကြရတာပါ။
“သူများနိုင်ငံတွေနဲ့မတူ၊ တမူကို ထူးတာ။ Senior Citizen တွေကို တန်ဖိုးထားပုံချင်း အရမ်းကွာတယ်။ တွဲခေါ်၊ ချီရတဲ့ သက်ကြီး ပင်စင်စားတွေ လဝကရုံးထဲမှာ မြင်လို့တောင် မကောင်းဘူး။ သက်ကြီးရွယ်အိုတွေမှာ ထမင်းစားချိန် ရောက်တာတောင် လဝကရုံးထဲမှာ ကိုယ့်အလှည့်ရောက်ဖို့အရေး မစားမသောက်နဲ့ ထိုင်စောင့်နေရတယ်” လို့ ပင်စင်စားတွေရဲ့ ဒုက္ခကို မြင်တွေ့နေရသူ တယောက်က စိတ်မသက်မသာနဲ့ ညည်းညူ ပြောဆိုလိုက်ပါတယ်။ ။
Photo – CJ
